საქართველოს გარემოსა და ბუნებრივი რესურსების დაცვის მინისტრის მოადგილე შალვა ამირეჯიბი, დაცული ტერიტორიების სააგენტოს თავმჯდომარე რატი ჯაფარიძე და გაეროს განვითარების პროგრამის (UNDP) წარმომადგენელი საქართველოში ნილს სკოტი დედოფლისწყაროში, კოლხური ხოხბის აღდგენის პროექტს გაეცნენ. მათ ვაშლოვანის მეგობართა ასოციაციის მიერ დაარსებული კოლხური ხოხბის საშენი დაათვალიერეს. ვაშლოვანის დაცული ტერიტორიების მეგობართა ასოციაციამ დაცული ტერიტორიების სააგენტოსთან ერთად ,,კოლხური ხოხბის საშენი ცენტრის დაარსების" პროექტი შეიმუშავა, რომელიც კომპანია „ბრითიშ პეტროლეუმის (BP), მისი პარტნიორი კომპანიების, ევრაზიის თანამშრომლობის ფონდის, ასევე გლობალური გარემოსდაცვითი ფონდისა (GEF) და გაეროს განვითარების პროგრამის (UNDP) მიერ მცირე გრანტების პროგრამის ფარგლებში ხორციელდება. მისი მთავარი მიზანი კოლხური ხოხბის გამრავლება და მეხოხბეობის, როგორც სოფლის მეურნეობის დარგის განვითარებაა. პროექტის ხელმძღვანელებმა კოლხური ხოხბის საშენში ბუნებიდან ველური ხოხბის კვერცხები ამოიღეს და მათი ინკუბაცია მოახდინეს. დღეისათვის ვოლიერებში 100 ზრდასრული და 150 მდე ლაპი იმყოფება. პროგრამის ფარგლებში იგეგმება ანალოგიური კოლხური ხოხბის საშენების მოწყობა 3 სამონადირეო მეურნეობაში. მოგვიანებით უკვე გამრავლებული ხოხბების ბუნებაში გაშვება მოხდება მათზე ნადირობის მიზნით. პროექტის წარმატებით მიმდინარეობის აღსანიშნავად მინისტრის მოადგილემ და გაეროს წარმომადგენელმა ველურ ბუნებაში სიმბოლურად კოლხური ხოხბები გაუშვეს.