ლაგოდეხის დაცულ ტერიტორიებზე ფოტომახემ ირემი დააფიქსირა. დაცული ტერიტორიების ადმინისტრაციის უფროსის გიორგი სულამანიძის თქმით, ვიდეო ადასტურებს, რომ ნაკრძალში ირმების რაოდენობა იზრდება. მისივე თქმით, ბოლო მონაცემებით, ლაგოდეხის დაცულ ტერიტორიებზე სულ მცირე 300 ირემი ბინადრობს.

„ამ ადგილას ირემი პირველად გადავიღეთ. განაპირა ადგილია, რაც იმას ნიშნავს, რომ ირმები იქაც დაცულად გრძნობენ თავს და დღისით გამოჩენას არ ერიდებიან“, - უთხრა გიორგი სულამანიძემ კახეთის საინფორმაციო ცენტრს.

საქართველოში კავკასიური კეთილშობილი ირემია გავრცელებული. გიორგი სულამანიძის თქმით, გასული საუკუნის 50-იან წლებამდე ირემი მთელ საქართველოში გვხვდებოდა, გარდა კოლხეთის დაბლობისა. მომდევნო პერიოდში ირმების რაოდენობამ ნელ-ნელა იკლო და დღეს, სიცოცხლისუნარიანი პოპულაცია მხოლოდ ლაგოდეხსა და ბორჯომშია შემორჩენილი.

„ირემი საქართველოში იშვიათობა გახდა. 1989 წლის მონაცემით, ლაგოდეხის ნაკრძალში  1400 ირემი ბინადრობდა. 90-იან წლებში განუკითხაობა იყო ტყეშიც. შედეგად, 1999 წელს ნაკრძალში მხოლოდ 70–მდე ირემი დარჩა“, - ამბობს გიორგი სულამანიძე.

მისივე თქმით, 2007 წლის შემდეგ, რაც დაცული ტერიტორიების სისტემის რეფორმა დაიწყო, მდგომარეობა გაუმჯობესდა. გასული წლის აღრიცხვით, ლაგოდეხის დაცულ ტერიტორიებზე სულ მცირე 300 ირემი ბინადრობს.

„მაქსიმალურად ვცდილობთ ხელი შევუწყოთ ირმის გამრავლებას. უზრუნველვყოფთ მათ დაცვას არა მხოლოდ ბრაკონიერებისგან, არამედ ხმაურისგანაც. ხმაურის შემთხვევაში ირემმა შესაძლოა დატოვოს ტერიტორია და გადავიდეს სხვაგან, მაგალითად, დაღესტანში ან აზერბაიჯანში. ლაგოდეხისა და ბორჯომის პოპულაცია უნდა გამრავლდეს, რათა მთელ საქართველოში ირმების რაოდენობა გაიზარდოს“, - ამბობს გიროგი სულამანიძე.

ლაგოდეხის დაცული ტერიტორიების ფართობი 25 ათასი ჰექტარია. გიორგი სულამანიძის თქმით, ამ ტერიტორიის ტევადობა დიდია და 1000-ზე მეტი ირმის გამოკვება შეუძლია