კუბაში მამაკაცი დააკავეს - მას 66 ჩიტი შარვლის უბეში ჰყავდა მიკერებული.

სამართალდამცავებმა მგზავრი აეროპორტში დააპატიმრეს - ის ამერიკაში გაფრენას აპირებდა. ინციდენტი ქალაქ კამაგუეიში მოხდა. უსაფრთხოების სამსახურის თანამშრომლებმა მამაკაცს შარვლის გახდა მას შემდეგ მოსთხოვეს, როდესაც შენიშნეს, რომ ნაჭერი უცნაურად იყო ამოზნექილი. მან თანამშრომლებს წინააღმდეგობა გაუწია და აცხადებდა, რომ შარვალში მტრედი ჰყავდა, რომელიც შვილიშვილისთვის საჩუქრად მიჰქონდა. საბოლოოდ მამაკაცმა შარვალი გაიხადა.

სამართალდამცავები გაოცებულნი დარჩნენ, როდესაც ნახეს რომ შარვალში შეშინებული პატარა სკვინჩები და კოლიბრები იყვნენ. ჩიტებს ნისკარტები აკრული ჰქონდათ, შესაბამისად, მათი ჭიკჭიკის ხმა არავის გაუგია. როგორც პოლიციელებმა განაცხადეს, ყველა მათგანი იშვიათი სახეობისაა და სავარაუდოდ, მოპარულია.

სამართალდამცავების თქმით, 2 ჩიტი, რომელიც მამაკაცის სასქესო ორგანოსთან ახლოს იყო მოთავსებული, დაიღუპა. მამაკაცს 2 წლით პატიმრობა ელის.

მომზადებულია dailymail.co.uk-ის მიხედვით.