გარემოს დაცვის სამინისტროს დაცული ტერიტორიების სააგენტოს თავმჯდომარემ გიორგი შონვაძემ და თბილისის სახელმწიფო სამხატვრო აკადემიის რექტორმა გია ბუღაძემ ერთობლივი შემოქმედებითი და საგანმანათლებლო პროგრამების განხორციელების მიზნით ურთიერთანამშრომლობის მემორანდუმს მოაწერეს ხელი.
ურთიერთთანამშრომლობის მემორანდუმის ფარგლებში დაცული ტერიტორიების სააგენტო ხელს შეუწყობს სტუდენტებისათვის დაცულ ტერიტორიებზე ექსკურსიების და ლაშქრობების მოწყობას, დაინტერესებული მეცნიერებისა და სტუდენტებისთვის ვიზიტს დაცული ტერიტორიების ადმინისტრაციებში და მონაწილეობას მიიღებს უნივერსიტეტის მიერ ორგანიზებულ ღონისძიებებში.

„დაცული ტერიტორიების სააგენტოსთვის მნიშვნელოვანია უმაღლეს სასწავლებლებთან მჭიდრო თანამშრომლობა. სამხატვრო აკადემიასთან გაფორმებული მემორანდუმის ძირითადი მიზანია სტუდენტების ჩართვა ეკო-საგანმანათლებლო ღონისძიებებში. იგეგმება სხვადასხვა გამოფენების, კონკურსების განხორციელება." განაცხადა დაცული ტერიტორიების სააგენტოს თავმჯდომარემ გიორგი შონვაძემ.

აკადემია ხელს შეუწყობს სასწავლო-შემოქმედებითი სამუშაოების განხორციელებას საქართველოს დაცულ ტერიტორიებზე, საშუალება მისცემს სააგენტოს წარმომადგენლებს, ისარგებლონ უნივერსიტეტის ბიბლიოთეკით და მატერიალურ-ტექნიკური ბაზით დაგეგმილი ღონისძიებების ჩასატარებლად, მონაწილეობას მიიღებს სააგენტოს მიერ განხორციელებულ სხვადასხვა სახის საგანმანათლებლო პროგრამებში, კონკურსებში, გამოფენებში და ა. შ.
„დაცული ტერიტორიების სააგენტოს ინიციატივით მოხდა ამ ხელშეკრულების გაფორმება. ეს ძალიან სასიამოვნოა. ჩვენ შეგვიძლია ერთობლივი ღონისძიებები განვახორციელოთ. გვეძლევა ძალიან კარგი შესაძლებლობა, რომ ახლგაზრდების, ჩვენი სტუდენტების მონაწილეობით ვემსახუროთ არაჩვეულებრივ ბუნებას." აღნიშნა თბილისის სახელმწიფო სამხატვრო აკადემიის რექტორმა გია ბუღაძემ.

ღონისძიების პარალელურად მოეწყო თუშეთის ეროვნული პარკის ფოტო-გამოფენა, რომელიც სამხატვრო აკადემიაში ერთი კვირის განმავლობაში გაგრძელდება. აგრეთვე, მოწვეული სტუმრები საქართველოს დაცული ტერიტორიების შესახებ პრეზენტაციას დაესწრნენ.

moe.gov.ge-ს მასალებიდან