იუნესკოს მსოფლიო კულტურული მემკვიდრეობის ძეგლები ესპანეთში

1.ალჰამბრა და ხენერალიფე გრანადაში.
2.ბურგოსის კათედრალი,
3.კორდობა,
4.ესკორიალი,
5.ანტონიო გაუდის ქმნილებები.

იუნესკოს მსოფლიო კულტურული მემკვიდრეობის ძეგლების სიაში მსოფლიოს მასშტაბით 878 ძეგლია შეტანილი, მათ შორის 4,6 % ესპანეთის წილია. აქედან:
36 კულტურული ობიექტია
3 ბუნების ობიექტია (გარახონაის ეროვნული პარკი, დონიანას ეროვნული პარკი და ტეიდეს ეროვნული პარკი)
2 შერეული ტიპის ობიექტია (იბიცა და მონტე-პერდიდოს ეროვნული პარკი)

ალჰამბრა

ალჰამბრა- მავრიტანული პერიოდის არქიტექტურული ანსამბლი სამხრეთ ესპანეთში, ქალაქ გრანადის აღმოსავლეთ ნაწილში, გორაკიან ტერასაზე. შედგება მეჩეთის, სასახლისა და ციხესიმაგრისაგან. აშენდა XIV საუკუნეში, როგორც მავრი მმართველების რეზიდენცია და წარმოადგენს ისლამური არქიტექტურის მუზეუმს. შეტანილია იუნესკოს კულტურული მემკვიდრეობის ძეგლების სიაში.

ხენერალიფე

ხენერალიფე– XIII–XIV საუკუნეების გრანადის მმართველი ნასრიდების დინასტიის ყოფილი ქალაქგარეთა რეზიდენცია. ხენერალიფეს ბაღები მდებარეობს სერო-დელ-სოლის ბორცვზე. მასთან ახლოს მდებარეობს ციხესიმაგრე ალჰამბრა და ალბაისინის დასახლებული რაიონი, რომელტან ერთადაც 1984 წელს შეიტანეს იუნესკოს მსოფლიო მემკვიდრეობის ძეგლების სიაში, როგორც „შუა საუკუნეების არაბული სამეფო რეზიდენციების ფასდაუდებელი მაგალითი".

ბურგოსის საკათედრო ტაძარი

ბურგოსის კათედრალი (ესპ. Catedral de Burgos) - ღვთისმშობლის სახელობის ეკლესია ესპანეთის ქალაქ ბურგოსში. საძირკველი ჩაეყარა 1221 წელს, როგორც კასტილიის საკათედრო ტაძარს. მშენებლობა დასრულდა XV-XVI სს. ტაძარი წარმოადგენს ესპანური გოთიკის ყველაზე უფრო ბრწყინვალე ძეგლს. მისი გიგანტური თაღედი გახდა ძირითადი ატრიბუტი ესპანურენოვანი მსოფლიოს მონასტრებისთვის (განსაკუთრებით სამხრეთ ამერიკაში).

ტაძრის მშენებლობა დაიწყო 1221 წლის 20 ივლისს, ყოფილი რომაული ტაძრის ადგილზე კასტილიის მეფის ფერდინანდ III-ის ბრძანებით.
1919 წელს ეკლესიაში დაასაფლავეს ესპანეთის ეროვნული გმირი, კასტილიელი რაინდი სიდ კამპეადორი და მისი მეუღლე დონია ხიმენა.
1984 წელს შეიტანეს იუნესკოს კულტურული მემკვიდრეობის ძეგლების სიაში

ქალაქ კორდობის ისტორიული ცენტრი

ქალაქის ცენტრს შენარჩუნებული აქვს ძველი არქიტექტურული დაგეგმარება. განაშენიანებულია მავრიტანული ეპოქის დროინდელი დაბალი ერთსართულიანი სახლებით, რომელთაც ყრუ ფასადები და გამწვანებული შიდა ეზოები (პატიო) აქვთ.
ხუროთმოძღვრული ძეგლებიდან აღსანიშნავია:
რომაული ხანის ხიდი.
არაბული კოშკი კალაორა.
ტაძარი (758 წ. 1236 წლამდე მეჩეთი).
სან-ნიკოლასის ეკლესია (XIII-XVI სს.).
სინაგოგა (1315 წ.).
რატუშა (1594–1631 წწ.).
XVIII საუკუნის რენესანსული სასახლეები, მოედნები.

ესკორიალი

ესკორიალი (ესპ. Monasterio San Lorenzo de El Escorial) - მონასტერი, სასახლე და ესპანეთის მეფე ფილიპე II-ის რეზიდენცია. მას უწოდებენ: "მსოფლიოს საოცრებას", "მონოტონურ სიმფონიას ქვაში" და "არქიტექტურულ კოშმარს".
მონასტერის ისტორია იწყება 1557 წლის 10 აგვისტოს, როდესაც ფილიპე II-მ დაამარცხა ფრანგები სენტ-კატენის ბრძოლაში. ეს მოხდა სან ლორენცოს (San Lorenzo) ხსენების დღეს. ფილიპე II-მ სწორედ ამ წმინდანის საპატივსაცემოდ ააგო ესკორიალის მონასტერი.
მონასტრის მშენებლობას საფუძველი ჩაუყარეს 1563 წელს. მშენებლობა გრძელდებოდა 21 წელი. მონასტრის მთავარი არქიტექტორი იყო მიქელანჯელოს მოსწავლე ხუან ბაუტისტა დე ტოლედო, ხოლო მსი სიკვდილის შემდეგ 1569 წელს, მშენებლობა გააგრძელა და დაასრულა ხუან დე ერერამ.
1984 წელს ესკორიალის მონასტერი შეიტანეს იუნესკოს კულტურული მემკვიდრეობის ძეგლების სიაში.

ალტამირის მღვიმე
ალტამირის მღვიმე (ესპ. Altamira — მაღალი ხედი) — მღვიმე ესპანეთში, განთქმული ზემო პალეოლითის პერიოდის კედლის მხატვრობით. მღვიმე 295 მეტრის სიგრძისაა და მდებარეობს დასახლება სანტილანა დელ მარის სიახლოვეს, კანტაბრიაში, 30 კილომეტრში ქალაქ სანტანდერის დასავლეთით. მისი კედლები მოხატულია ველური ძუძუმწოვრებისა და ადამიანის ხელების ფერადი და პოლიქრომული გამოსახულებებით. მღვიმე ნახატებიანად იუნესკოს კულტურული მემკვიდრეობის ძეგლების სიაშია შეტანილი.

ავილა

ავილა- ქალაქი ესპანეთში, ავილას პროვინციის ადმინისტრაციული ცენტრი. მდებარეობს მდინარე ადახოს (დურეოს შენაკადი) მარჯვენა ნაპირზე. ესაა ზღვის დონიდან ყველაზე მაღლა მდებარე პროვინციის დედაქალაქი ესპანეთში. ქალაქის ღირსშესანიშნაობები და მთლიანად ქალაქი 1985 წლიდან შეტანილია იუნესკოს კულტურული მემკვიდრეობის ძეგლებში.

ძველი ქალაქი სეგოვია და სეგოვიის აკვედუკი

სეგოვია (ესპ. Segovia) - ქალაქი ესპანეთში, კასტილიისა და ლეონის ავტონომიურ რეგიონში. სეგოვიის პროვინციის ადმინისტრაციული ცენტრი. მდინარეებს ერესმასა და კლამორესს შორის. მდებარეობს მადრიდიდან ჩრდილოეთ-დასავლეთით 90 კილომეტრზე. სეგოვია ტოლედოსთან და ავილასთან ერთად არის ქალაქი-მუზეუმი, რომელიც ესპანეთის დედაქალაქის გარშემო მდებარეობს. ქალაქის ღირსშესანიშნაობები და მთლიანად ქალაქი 1985 წლიდან შეტანილია იუნესკოს კულტურული მემკვიდრეობის ძეგლებში.

სეგოვიის აკვედუკი (ესპ. Acueducto de Segovia) — ყველაზე გრძელი ძველრომაული აკვედუკი შემონახული დასავლეთ ევროპაში. მდებარეობს ესპანეთის ქალაქ სეგოვიაში. მისი სიგრძეა 728 მ, სიმაღლე—28 მ. წარმოადგენს მრავალკილომეტრიანი წყალსადენის მიწისზედა მონაკვეთს. აკვედუკის აგების თარიღი სადაოა (სავარაუდოდ ვესპასიანეს მმართველობის პერიოდში). შეტანილია იუნესკოს მსოფლიო კულტურული მემკვიდრეობის ძეგლთა სიაში.