შეაჩერე კლიმატის ცვლილება, ითამაშე შენი როლი` – ამ სახელწოდების ერთობლივი აქციით რამდემე ორგანიზაციამ ვარდების მოედანზე დედამიწის საერთაშორისო დღე აღნიშნა. მოედანზე, `მწვანე` ანუ ჰიბრიდული მანქანების გამოფენა მოეწყო, რომლებიც ერთდროულად შიდა წვისა და ელექტროძრავებითაა აღჭურვილი. ავტომობილები საწვავის მოხმარების სიმცირით და ეკოლოგიური დაბინძურების დაბალი მაჩვენებლით გამოირჩევა.
ღონისძიებას თბილისის მერიც დაესწრო. გიგი უგულავამ ასეთი ტიპის ავტომობილების მნიშვნელობაზე ისაუბრა. მისი თქმით, ეკოლოგიური უსაფრთხოების თვითშეგნება მოსახლეობაში ნაკლებია, მაგრამ თბილისის მერია ყველანაირად ცდილობს, სხვადასხვა პროექტებით მოქალაქეებში აამაღლოს ეკოლოგიური საკითხების აქტუალობა.
დედამიწის საერთაშორისო დღის აღნიშვნა ფილარმონიის მიმდებარე ტერიტორიაზე დაიწყო, სადაც 50-მდე სტუდენტმა სიმბოლურად დედამიწა გამოსახა. წელს ყველა მონაწილე ერთიანდება ერთი თემის ირგვლივ -"მილიარდი მწვანე ქმედება", რომელიც მიზნად ისახავს ნახშირბადის გამონაბოლქვის შემცირების და მდგრადი განვითარების ხელშეწყობას.
პარალელურად, მონაწილეებმა მოსახლეობას დაურიგა საინფორმაციო ბროშურები და საჰაერო ბურთები სპეციალური სლოგანით - "დედამიწელები დედამიწისთვის", სამხატვრო აკადემიის სტუდენებმა კი მსურველებს სახეზე დედამიწის დღის ლოგო დაახატეს. აქციაში მონაწილეობას ,,მომავლის სახლის" აღსაზრდელებიც იღებდნენ. ღონისძიება სოფელ შავშვებში გაგრძელდება, სადაც ახალგაზრდებმა დევნილ ბავშვვებს "დედამიწის სკვერი" მოუწყეს და სკოლის ეზოში სხვადასხვა სახეობის 100 ნერგი დარგეს. აქცია ახალგაზრდული არასამთავრობო ორგანიზაციების - "მწვანე კლუბი", "ახალგაზრდა ლიდერთა კლუბი," "მწვანეთა მოძრაობა" ორგანიზებით და გარემოს დაცვის სამინისტროს მხარდაჭერით ჩატარდა.
დედამიწის საერთაშორისო დღე 1970 წლიდან აღინიშნება და მსოფლიოში ერთ-ერთი ყველაზე მასშტაბური გარემოსდაცვითი ღონისძიებაა. ყოველ წელს დედამიწის დღისადმი მიძღვნილ სხვადასხვა ღონისძიებაში მილიონობით მოხალისე დედამიწაზე საკუთარი გარემოს გაუმჯობესების მიზნით მონაწილეობს.
დედამიწის საერთაშორისო დღესთან დაკავშირებით, "ნაციონალური მოძრაობის" ახალგაზრდული ფრთის ინიციატივით, მცხეთის ჯვრის ტერიტორია საყოფაცხოვრებო ნარჩენებისგან გასუფთავდა.
დასუფთავების აქციას პრეზიდენტიც შეუერთდა. მიხეილ სააკაშვილმა გამწვანების აქციაშიც მიიღო მონაწილეობა და ხეებზე ფრინველებისთვის ხელოვნური ბუდეებიც მიამაგრა.
ჯვრის მონასტრის ტერიტორიაზე, დღეს, 200-მდე ნერგი დარგეს.
მმართველი პარტიის ახალგაზრდული ფრთა დასუფთავების აქციების განხორციელებას პერმანენტულად გეგმავს.
გამწვანების აქციები მოეწყობა საქართველოს სხვადასხვა რეგიონებშიც.
ვებ-გვერდზე გამოქვეყნებული მასალის გამოყენების ყველა უფლება ეკუთვნის საიტი "www.bazieri.ge"-ს ადმინისტრაციას. ამ მასალის (თუ მასალას სხვა რამ არ აქვს მითითებული) ნაწილობრივი ან სრული გამოყენება საიტი "ბაზიერი"-ს ადმინისტრაციასთან წერილობითი შეთანხმების გარეშე ან წყაროს: www.bazieri.ge-ს მითითების გარეშე დაუშვებელია !!!
gogita12 გავიხსენოთ "ბაზიერის" პირველი ტურნირი ❤ 
