2011 წლის აპრილში დაცული ტერიტორიების სააგენტოს ინიციატივით ჯავახეთის ეროვნული პარკი დაარსდა. ეროვნული პარკი 14,200 ჰექტარს მოიცავს. ჯავახეთის დაცული ტერიტორიების ფარგლებში აგრეთვე შეიქმნა ხანჩალის ტბის, ბუღდაშენის ტბის, კარწახის ჭაობის, სულდის ჭაობის და მადათაფის ტბის აღკვეთილები.
პროექტის ბიუჯეტი 2,500,000 ევროს შეადგენს. „ჯავახეთის ეროვნული პარკის შექმნა საქართველოში" პროექტის დონორია გერმანიის მთავრობა გერმანიის რეკონსტრუქციის საკრედიტო ბანკის (KFW) გავლით და განმახორციელებელი - ბუნების დაცვის მსოფლიო ფონდი (WWF) გერმანია კონსორციუმი WWF Caucasus PO-სთან ერთად.

ჯავახეთის ეროვნული პარკის შექმნის ფარგლებში განხორციელდება ტურისტული ინფრასტრუქტურის მოწყობა: ადმინისტრაციული და ვიზიტორთა ცენტრის, მცველთა საგუშაგოების, ბერდვოჩინგისთვის სასტუმროს მშენებლობა, საკემპინგე, საპიკნიკე ადგილების და ტურისტულ მარშრუტებზე მცირე ტურისტული ინფრასტრუქტურის მოწყობა; აგრეთვე, ტურიზმის განვითარების, ადმინისტრაციული, დაცვის, ეკო-საგანმანათლებლო და კვლევა-მონიტორინგის პროგრამები და სოციალური პროექტები: საოჯახო სასტუმროების მოწყობა, გიდის მომსახურება, ცხენების გაქირავება, ადგილობრივი პროდუქციის წარმოება და ტრადიციული ხელსაქმის განვითარება, რაც ადგილობრივი მოსახლეობის სოციალურ-ეკონომიკური მდგომარეობის გაუმჯობესებას და მოსახლეობისთვის შემოსავლის ალტერნატიული წყაროს შექმნას შეუწყობს ხელს.

ჯავახეთის დაცული ტერიტორია გლობალური მნიშვნელობის ეკოლოგიური ფასეულობით და ეკოსისტემების მრავალფეროვნებით გამოირჩევა. ჯავახეთის ეროვნული პარკი საზღვრისპირა რეგიონებსაც მოიცავს, მათ შორის კარწახის ტბის ნაწილს, რომელზეც გადის საქართველო თურქეთის საზღვარი.

www.dpa.gov.ge-ს მასალებიდან